बाढीपहिरो : धादिङसहित बागमतीका १० जिल्लामा २१ जनाको मृत्यु,२५ जना बेपत्ता

हेटौंडा । दुई दिनको अवधीमा बागमती प्रदेशका १० जिल्लामा विपदका घटनाबाट २१ जनाको मृत्यु भएको छ ।

उपत्यकाको काठमाडौं, ललितपुर र भक्तपुरबाहेक १० जिल्लामा विपद्का घटनाबाट २५ जना बेपत्ता र ३१ जना घाइते भएका बागमती प्रदेश प्रहरी कार्यालय हेटौंडाले जनाएको छ।

दुई दिनमा बाढी, पहिरोलगायतका विपदका घटनाबाट सबैभन्दा बढी मृत्यु हुनेमा काभ्रेका १० जना रहेका छन् ।

बाढीपहिरोबाट काभ्रेमै ११ जना बेपत्ता र ११ जना घाइते भएका छन् ।

प्रदेश प्रहरी कार्यालयका निमित्त प्रवक्ता प्रहरी नायव उपरीक्षक जीतेन्द्र बस्नेतका अनुसार सिन्धुपाल्चोकमा बाढीपहिरोबाट ६ जनाको मृत्यु ४ जना बेपत्ता र १६ जना घाइते, दोलखामा पहिरो खसेर ३ जनाको मृत्यु १ जना घाइते भएको छ।

धादिङ र सिन्धुलीमा १–१ जनाको मृत्यु भएको र सिन्धुलीमा १ जना बेपता रहेको जानकारी दिनुभयो।

धादिङमा ३ जना बेपत्ता भएको प्रहरीले जनाएको छ ।

मकवानपुरमा ७ जना बेपत्ता भएका छन् । शनिबार मकवानपुरको इन्द्रसरोबर गाउँपालिका–३, स्थितबत्सलादेवी माविको एन्फा एकेडेमीमा रहेका बालक पहिरोले पुरिएको विवरणबाहेक प्रदेशका १० जिल्लामा २१ जनाको मृत्यु भएको हो ।

चितवन, नुवाकोट, रसुवा र रामेछापमा विपदबाट हालसम्म मानवीय क्षति नभएको डीएसपी बस्नेतले जानकारी दिनुभयो।

विपदका घटनाबाट १५ वटा पशुचौपायाको मृत्यु भएको प्रहरी तथ्यांक छ । ६६ वटा घरमा पूर्ण र २ वटा घरमा आंशिक क्षति पुगेको डीएसपी बस्नेतले जानकारी दिनुभयो।

१९२ परिवार प्रभावित क्षेत्रबाट स्थानान्तरण भएको छ ।

२ वटा पक्की पुल र एउटा बेलिब्रिजमा क्षति पुगेको छ । ५९ वटा घर तथा कार्यालय उच्च जोखिममा रहेको प्रदेश प्रहरी कार्यालयले जानकारी दिएको छ ।

विपद्तका घटनामा उद्दारका लागि ४ हजार ११९ जना प्रहरी परिचालन गरिएको कार्यालयले जनाएको छ ।