आजको मौसम यस्तो छ

: पाँच वटा प्रदेशमा आज मौसम आंशिकदेखि सामान्य बदली छ । केही ठाउँमा बिहानैदेखि हल्कादेखि मध्यम वर्षा भइरहेको छ ।

बागमती, कोशी, मधेस, गण्डकी र लुम्बिनी प्रदेशका जिल्लामा मौसम आंशिकदेखि सामान्य बदली भई केही ठाउँमा पानी परिरहेको मौसम पूर्वानुमान महाशाखाले जनाएको छ । पछिल्लो तीन घण्टामा सबैभन्दा धेरै धनुषाको तुल्सीमा ४५ मिलिमिटर वर्षा मापन भएको छ । यस्तै झापाको दमकमा ३६ दशमलव ८ मिलिमिटर पानी परेको छ ।

आज दिउँसो कोशी, बागमती, गण्डकी र लुम्बिनी प्रदेशका केही ठाउँमा तथा बाँकी प्रदेशका थोरै ठाउँमा ठूलो पानी पर्न सक्ने सम्भावना छ । कतै–कतै मेघगर्जन र चट्याङसहित हल्कादेखि मध्यम वर्षाको सम्भावना रहेको छ । बाँकी प्रदेशको मौसम सामान्य बदली रहने मौसम पूर्वानुमान महाशाखाले जनाएको छ।