कांग्रेसका जनप्रतिनिधिले नेतृत्व गरेका २१ स्थानीय तह सम्मानित

कांग्रेसका जनप्रतिनिधिले नेतृत्व गरेका २१ स्थानीय तह सम्मानित भएका छन्, नेपाली कांग्रेसकाे स्थानीय तह समन्वय विभागकाे आयाेजनामा पार्टीबाट निर्वाचित जनप्रतिनिधिहरुले नेतृत्व गरेका २१ वटा स्थानीय तहलाई तीन वटा विधामा सम्मान गरिएकाे हाे ।

कांग्रेसले महालेखा परिक्षककाे आ.व. २०७९/८० काे वार्षिक प्रतिवेदन अनुसार कम बेरुजु हुने ६ वटा स्थानीय तह, सङ्घीय मामिला तथा सामान्य प्रशासन मन्त्रालयले सार्वजनिक गरेको आ.व. २०७९/८० काे स्थानीय तह संस्थागत स्वमुल्याङ्कनका आधारमा ७ वटा स्थानीय तह र आ.व. २०७९/८० काे स्थानीय तह वितीय सुशासन जाेखिम मुल्यांकनका आधारमा ८ वटा स्थानीय तहलाई सम्मान गरेकाे हाे।

कांग्रेसले महालेखा परिक्षककाे आ.व. २०७९/८० काे वार्षिक प्रतिवेदन अनुसार कम बेरुजु हुने स्थानीय तहहरुमा धादिङको नेत्रवती डवजाेङ गाउँपालिका, नुवाकोटकाे म्यागङ गाउँपालिका, सर्लाहीकाे विष्णु गाउँपालिका, काठमाडौंको नागार्जुन नगरपालिका, साेलुखुम्बुकाे साेलुदुधकुण्ड नगरपालिका र काभ्रेकाे पनाैती नगरपालिकालाई सम्मान गरेकाे छ।

त्यस्तै, आ.व. २०७९/८० काे स्थानीय तह संस्थागत स्वमुल्याङ्कनका आधारमा कांग्रेसले तीन वटा नगरपालिका चार वटा गाउँपालिकालाई सम्मान गरेकाे छ । सम्मानित हुने नगरपालिकाहरुमा धादिङको नीलकण्ठ नगरपालिका, रुपन्देहीको तिलाेत्तमा नगरपालिका र चितवनको रत्ननगर नगरपालिका रहेका छन् । त्यस्तै स्याङ्जाको अर्जुनचाैपारी गाउँपालिका, पर्वतको जलजला गाउँपालिका, गुल्मीको मदाने गाउँपालिका र धादिङको ज्वालामुखी गाउँपालिका रहेका छन् ।

त्यस्तै आ.व. २०७९/८० काे स्थानीय तह वितीय सुशासन जाेखिम मुल्यांकनमा परेका चार वटा नगरपालिकाहरु इलामकाे इलाम नगरपालिका, चितवनकाे खैरहनी नगरपालिका, सिन्धुपाल्चोककाे मेलम्ची नगरपालिका र खाेटाङकाे हलेसी तुवाचुङ नगरपालिकालाई नेपाली कांग्रेसले सम्मान गरेकाे छ । गाउँपालिकातर्फ सिन्धुलीकाे ध्याङ्लेद गाउँपालिका, दैलेखकाे महाबु गाउँपालिका, गुल्मीकाे मदाने गाउँपालिका र हुम्लाकाे सर्केगाड गाउँपालिकालाई सम्मानित गरेको छ।

केन्द्रीय सदस्य तथा स्थानीय तह समन्वय विभागका प्रमुख मधु आचार्यले पार्टीबाट निर्वाचित भएर स्थानीय सरकारकाे जिम्मेवारीमा रही महत्त्वपूर्ण भूमिका निर्वाह गर्दै जनताकाे सेवा प्रवाहलाई ध्यान दिएकाेमा याे सम्मान गरिएको बताउनुभयो ।

जिल्ला समन्वय समिति महासंघका अध्यक्ष राजन मेहेताले संविधानमा नै व्यवस्था गरेर अनुगमन गर्ने नाममा कायम राखिएको जिल्ला समन्वय समितिलाई जिम्मेवारी विहिन बनाएर राखिएको भन्दै प्रभावकारी बनाउनका लागि नेतृत्व तहलाई आग्रह गर्नुभयाे ।

सम्मानित हुने स्थानीय तहहरुकाे तर्फबाट मन्तव्य राख्नुहुँदै नेपाल नगरपालिका संघका अध्यक्ष तथा धादिङको नीलकण्ठ नगरपालिकाका प्रमुख भीम ढुंगानाले तीन वटा विधामा मुल्यांकन गरेर जिम्मेवारी अनुसार उत्कृष्ट काम गर्न जाेश र जाँगर सृजना गरेकाे बताउनुभयाे ।

गाउँपालिका महासंघकी अध्यक्ष लक्ष्मीदेवी पाण्डेले सम्मानले स्थानीय तहहरुलाई संघीयताको मर्म अनुरुप काम गर्न हाैसला मिलेकाे बताउनुभयो ।

देश भरका ७ सय ५३ वटा स्थानीय तहहरुमध्ये ३ सय ३२ वटा स्थानीय तहमा नेपाली कांग्रेसबाट निर्वाचित जनप्रतिनिधिहरुकाे नेतृत्व रहेकाे छ।