नीलकण्ठ नगरपालिका द्वारा स्वर्ण पदक विजेता समीक्षा र एरिकालाई  सम्मान

धादिङ । नेपालका लागि स्वर्ण पदक दिलाउन सफल धादिङको नीलकण्ठ नगरपालिका– ५ की समीक्षा ढुंगाना र नीलकण्ठ– १३ की एरिका गुरुङलाई सम्मान गरिएको छ। आइतबार एक कार्यक्रमबीच नीलकण्ठ नगरपालिकाले उनीहरूलाई जनही नगद ५० हजार रुपैयाँसहित सम्मानपत्र दिएको हो।

गत २० जुलाईमा भुटानमा सम्पन्न आठाैँ दक्षिण एसियाली खेलकुद (साफ)अन्तर्गत कराँते प्रतियोगितामा समीक्षाले नेपाललाई स्वर्ण पदक दिलाएकी थिइन्। नेपालको प्रतिनिधित्व गरेकी समीक्षाले ५३ केजी तौल समूहमा प्रतिस्पर्धा गरेकी थिइन्। त्यस्तै, २८ मार्चदेखि अप्रिल १ सम्म अमेरिकाको टेक्सासमा भएको युएस ओपन च्याम्पियनसीप कराँते प्रतियोगितामा एरिकाले ६८ केजी तौल समूहमा स्वर्ण पदक दिलाएकी हुन्।

देशको शिर उच्च बनाएका दुवै खेलाडीलाई थप प्रोत्साहनका लागि सम्मान गरिएको नगर प्रमुख भीमप्रसाद ढुंगानाले बताए। नीलकण्ठ नगरपालिकाका उपप्रमुख दीपक विश्वकर्माले खेल र खेलाडीको हितमा नगरपालिकाले काम गरिरहेको बताए।